Seanca konstituive e Kuvendit të Kosovës është ndërprerë pa u përmbyllur, pasi nuk është arritur të miratohet raporti i Komisionit për verifikimin e mandateve të deputetëve.

Pas rinisjes së punimeve të Kuvendit prej pauzës disa minutëshe, kryesuesi i seancës, Avni Dehari, ka njoftuar ndërprerjen e seancës duke theksuar se nuk ka shumicë të mjaftueshme për vazhdimin e procedurave.

Ai theksoi se seanca ndërpritet për shkak të rrethanave të krijuara dhe mungesës së konsensusit rreth raportit të paraqitur nga komisioni.

“Për shkak të rrethanave të krijuara dhe meqë raporti i Komisionit nuk mori votat e nevojshme, jemi të detyruar të ndërpresim seancën dhe përmes një letre do t’i drejtohemi Presidentes për të sqaruar hapat e mëtejmë,” deklaroi Dehari para deputetëve.

Sipas rezultatit të votimit, 52 deputetë votuan pro raportit, 46 ishin kundër, ndërsa 11 abstenuan – numra të pamjaftueshëm për miratimin e dokumentit.

Në hapje të punimeve, kryesuesi Avni Dehari ftoi përfaqësuesit e partive parlamentare që të propozonin emrat për Komisionin e përkohshëm për verifikimin e mandateve të deputetëve.

Rendi i ditës për seancën e sotme përfshinte: formimin e Komisionit të përkohshëm për verifikimin e kuorumit dhe të mandateve të deputetëve, betimin e deputetëve, zgjedhjen e Kryetarit të Kuvendit dhe nënkryetarëve të tij.