Rritet numri i kuotave të financimit për programet prioritare në Universitetin “Fan S. Noli” në Korçë. Për vitin e ri akademik janë miratuar 15 kuota, nga 6 që ishin një vit më parë, duke zgjeruar mundësinë për studentët që zgjedhin programe të konsideruara prioritare.

Mbështetja financiare, e barabartë me pagën minimale, do të ofrohet për studentët e programeve Biologji-Kimi, Matematikë-Fizikë dhe Inxhinieri Agronomike, me nga 5 kuota për secilin program.

“Ka disa vite që qeveria shqiptare përcakton disa kuota për degët preferenciale. Këtë vit kuotat janë rritur. Në qoftë se vit kishim 6 kuota, këtë vit kemi 15 kuota dhe janë të shpërndara sipas degëve. 5 për degën matematikë fizike, 5 për degën biologjikë kimikë dhe 5 në inxhinieri agronomike. Është një vlerësim i veçantë që po bëhet në disa degë të caktuara ku nuk ka patur prurjet që dëshiron sidomos në shkencat natyrore po ashtu dhe bujqësia që është prioritet i qeverisë”, u shpreh rektori Lorenc Ekonomi.

Rritja e kuotave synon të nxisë interesin e të rinjve për këto programe dhe të mbështesë formimin e profesionistëve në fusha që konsiderohen të rëndësishme për tregun e punës.

Studentët që përfitojnë nga skema do të kenë mundësinë të ndjekin studimet universitare duke marrë edhe mbështetje financiare të barabartë me pagën minimale, përgjatë ciklit të tyre të studimit.

Gazetare: E. Fili     

/rtsh.al/