E apasionuar pas udhëtimeve, Elsa Doka ka vizituar deri më tani 71 vende të botës, duke u njohur me kultura të ndryshme dhe shijuar bukuritë natyrore të tyre.

Në një intervistë për “Jetë Shqiptare” në RTSH, Elsa Doka i vlerëson udhëtimet si pasurinë më të madhe që ka, por jo gjithçka ka qenë pas sfida. Një prej tyre ishte edhe në Vietnam, ku e kishte pickuar një insekt mjaft i rrezikshëm për jetën.

“Në Vietnam kalova një vështirësi të madhe por me një ekip të mirë mjekësh në Itali e kalova. Pas 4 ditësh kuptova që më kishte pickuar një insekt dhe që ishte shumë i rrezikshëm i jetës. E kuptova pas 4 ditësh pasi mu paralizuar pjesa e qafës dhe iu drejtova spitalit. Me kura të forta për 10 ditë e kalova”, tha ajo.

Se cili është vendi që ajo ka pëlqyer më shumë gjatë udhëtimeve, Elsa Doka ka renditur 3 të preferuarat.

“Nga 71 vendet që kam vizituar, nuk mund të zgjedh vetëm një pasi secili nga këto shtete të dhuron diçka. Megjithatë në vendin e parë do vija Jordaninë, pastaj Filipinet për natyrën dhe plazhet që ka dhe Kaliforninë në SHBA me parqet natyrore që janë spektakël ngjyrash”, u shpreh Doka.

Aktualisht Elsa Doka ka mbi një muaj në Indonezi, ku synon të njohë edhe më mirë kulturën e saj.

“Indonezia ka mbi 17 mijë ishuj dhe deri tani kam vizituar vetëm 7 dhe kam një muaj që jam këtu. Për të parë gjithçka nuk të del një jetë, por për të filluar dhe të kuptosh kulturën e një vendi duhet të qëndrosh të paktën 2-3 javë. Indonezia ka të paktën 500 grupe etnike të ndryshme ku në çdo vend që shkon ke një kulturë të ndryshme”, tha ajo.

/rtsh.al/