Ministria e Shëndetësisë në Gaza, e drejtuar nga Hamasi ka bërë të ditur se numri i të vdekurve ka arritur mbi 69 mijë dhe 170,685 të plagosur që nga masakra e Hamasit më 7 tetor 2023 në jug të Izraelit.

Rritja e fundit në numrin e të vdekurve i atribuohet rikuperimit të më shumë trupave nën rrënoja që nga shpallja e armëpushimit në Rripin e shkatërruar, si dhe identifikimit të trupave më parë.

Numri i të vdekurve nuk mund të verifikohet në mënyrë të pavarur dhe nuk bën dallim mes civilëve dhe luftëtarëve.

Izraeli thotë se ka vrarë mbi 22,000 luftëtarë në betejë deri në gusht, plus 1,600 terroristë brenda Izraelit gjatë sulmit të 7 tetorit.

Izraeli ka thënë se kërkon të minimizojë viktimat civile dhe thekson se Hamasi i përdor civilët e Gazës si mburoja njerëzore, duke luftuar nga zona civile, përfshirë shtëpi, spitale, shkolla dhe xhamia.

Numri i të vdekurve izraelitë në ofensivën tokësore kundër Hamasit në Gazë dhe në operacionet ushtarake përgjatë kufirit me Rripin është 476. Ky numër përfshin dy policë dhe tre kontraktorë civilë të Ministrisë së Mbrojtjes.

Izraeli të shtunën ktheu trupat e 15 palestinezëve në Gaza, një ditë pasi militantët kthyen mbetjet e një pengu izraelit nën kushtet e armëpushimit të brishtë të ndërmjetësuar nga SHBA-ja.

Sipas marrëveshjes, Izraeli kthen 15 trupa palestinezësh për çdo peng izraelit të vdekur. Spitali Nasser në Khan Younis konfirmoi se 15 trupat u sollën atje.

/rtsh.al/