Ushtarë shqiptarë, bullgarë, grekë dhe rumunë nga Rezervat Operacionale kanë nisur dislokimin e tyre në Kosovë, në mbështetje të misionit të KFOR-it të udhëhequr nga NATO.

Sipas një komunikate zyrtare të KFOR-it, ky mision vijon të kontribuojë në krijimin e një mjedisi të sigurt për të gjithë banorët dhe komunitetet në Kosovë.

Batalioni i Forcës Multinacionale të Rezervës Operacionale (ORF) ka marrë përsipër detyrat nga Batalioni i Forcës Operacionale të Rezervës turke, bazuar në një plan rotacioni të mbikëqyrur nga Komanda e Forcës së Përbashkët të NATO-s në Napoli, Itali.

Me rreth 270 ushtarë, ky batalion do të operojë përkohësisht përkrah 200 forcave të rezervës të brigadës italiane “Sassari”.

Shtimi i këtyre forcave rrit aftësinë e KFOR-it për të reaguar ndaj zhvillimeve të mundshme të situatës së sigurisë, në përputhje me mandatin e tij afatgjatë bazuar në Rezolutën 1244 të Këshillit të Sigurimit të OKB-së të vitit 1999.

KFOR vazhdon të bashkëpunojë ngushtë me Policinë e Kosovës dhe Misionin e Bashkimit Evropian për Sundimin e Ligjit në Kosovë (EULEX), duke vepruar në mënyrë të paanshme për të garantuar sigurinë dhe stabilitetin në rajon.

/rtsh.al/