Një gjykatëse federale ka anuluar ndalesën që administrata e presidentit amerikan Donald Trump pati vendosur ndaj lëshimit të vizave imigruese për qytetarët e 75 vendeve, përfshi Shqipërinë dhe Kosovën, duke argumentuar se një politikë e tillë ishte në shkelje me ligjin federal të imigracionit pasi krijonte terren për diskriminim mbi bazën e kombësisë.

Në fillim të këtij viti, Departamenti Amerikan i Shtetit njoftoi ndaljen e dhënies së vizave imigruese për qytetarët e vendeve nga Europa, Afrika, Azia, Lindja e Mesme, Karaibet dhe Amerika Latine, me arsyetimin se qytetarët e këtyre vendeve mund të bëheshin barrë për sistemin amerikan të ndihmës publike.

Por gjykatësja Jeannette A. Vargas e qarkut jugor të Nju Jorkut u shpreh se ligji kërkonte që çdo aplikant të vlerësohej individualisht, duke marrë parasysh gjendjen financiare, moshën, shëndetin, aftësitë dhe rrethanat familjare. Sipas saj, politika e administratës Trump detyronte në praktikë zyrtarët konsullorë të refuzonin aplikime vetëm mbi bazën e shtetësisë, edhe kur aplikanti paraqiste prova se mund të përballonte financiarisht jetesën në SHBA.

/rtsh.al/