Ndryshimet klimatike kanë pasur ndikimin e tyre në Shkodër përgjatë dekadës së fundit. Dimrat e fundit kanë sjellë përmbytje të përsëritura, duke dëmtuar banesa, tokat bujqësore dhe infrastrukturën, ndërsa stinët e nxehta janë shoqëruar me rritje të rrezikut nga zjarret në pyje dhe zona të banuara.

Eksperti i mjedisit, Ervis Krymbi, thekson se këto fenomene nuk janë më të rastësishme, por pasojë direkte e ndryshimeve klimatike.

“Përmbytjet e njëpasnjëshme, që kanë ndodhur në dekadën e fundit dhe luhatjet e temperaturave, reshjet që grumbullohen në harku kohor të 72 orëve tregon se kemi një ndryshim të ciklit jashtëzakonisht të madh dhe impaktet negative në territor nuk janë të vogla”, u shpreh eksperti i mjedisit.

Megjithatë, Krymbi vlerëson faktin që vitet e fundit është rritur ndërgjegjësimi dhe janë ndërmarrë disa masa konkrete për përballimin e këtyre sfidave por duhet bërë më shumë.

“Janë marrë disa masa të caktuara në terren për përmbytjet lidhur me argjinaturat, kontrolli i kanaleve dhe kjo është diçka shumë pozitive”, tha ai.

Kombinimi i përmbytjeve në dimër dhe zjarreve në verë e bën Shkodrën një zonë të ekspozuar ndaj pasojave të drejtpërdrejta të klimës, por ekspertët shpresojnë që masat e marra dhe ndërgjegjësimi i qytetarëve të ndihmojnë në përballimin e këtyre sfidave në të ardhmen.

Gazetar: M. Gjini

/rtsh.al/