Delegacionet e SHBA-së dhe Iranit janë kthyer në Gjenevë për të rifilluar bisedimet indirekte mbi programin bërthamor, pas një pauze disaorëshe.

Burimet diplomatike tregojnë për AFP-në, se konvoje makinash të misioneve diplomatike amerikane dhe iraniane janë parë duke mbërritur sërish në rezidencën e ambasadorit të Omanit pas raundit fillestar në mëngjes.

Këto janë bisedimet e raundit të tretë të ndërmjetësuara nga Omani, në një klimë tensioni të lartë për shkak të grumbullimit masiv ushtarak amerikan në Lindjen e Mesme dhe paralajmërimeve të presidentit Trump për veprime të mundshme ushtarake nëse nuk arrihet marrëveshja.

Ministria e Jashtme iraniane bën të ditur se bisedimet janë “intensive dhe serioze”, me propozime praktike të diskutuar, dhe se do të vazhdojnë pas konsultimeve me kryeqytetet përkatëse.

Nga ana e saj, SHBA kërkon kufizime të forta (si zero pasurim ose transferim uraniumi), ndërsa Irani insiston në heqjen e sanksioneve.

Situata mbetet e tensionuar dhe pa detaje konkrete për përparim të menjëhershëm, por rifillimi tregon se palët duan të vazhdojnë dialogun për të shmangur përshkallëzim.

/rtsh.al/