Gjatë bisedimeve në Islamabad midis SHBA-së dhe Iranit, dy anije luftarake të Marinës Amerikane – shkatërrues të klasit Arleigh Burke me raketa udhëzuese – kanë kaluar ngushticën e Hormuzit për herë të parë që nga fillimi i luftës SHBA-Izrael kundër Iranit.

Sipas “The Wall Street Journal”, kalimi u krye pa incidente dhe nuk u koordinua me Teheranin.

Një zyrtar amerikan tha se ky ishte një operacion i fokusuar në lirinë e lundrimit nëpër ujërat ndërkombëtare.

Ky veprim vjen në kohën kur presidenti Trump deklaroi se SHBA-ja ka filluar pastrimin e ngushticës së Hormuzit për të siguruar rrjedhën e naftës globale, duke e quajtur një favor për vendet e tjera si Kina, Japonia dhe Franca.

Ngushtica e Hormuzit është një nga rrugët më të rëndësishme për transportin e naftës në botë, pasi aty kalon rreth 20-30% e naftës globale.

Pas armëpushimit dyjavor të brishtë, trafiku tregtar ka mbetur shumë i ulët për shkak të frikës nga minat detare dhe kërcënimet iraniane.

Irani ka mohuar se anijet amerikane kanë kaluar ngushticën, ndërsa media shtetërore iraniane raporton se një anije amerikane u paralajmërua për sulm brenda 30 minutave dhe u kthye mbrapsht.

Sipas mediave amerikane, thuhet se tentativa për kalim u ndalua nga Korpusi i Gardës Revolucionare Islamike.

Ndërkaq, bisedimet në Islamabad vazhdojnë sot, me delegacionet amerikane dhe iraniane që po përpiqen të forcojnë armëpushimin dhe të diskutojnë një zgjidhje më të gjatë për konfliktin.

/rtsh.al/