Kryeministri izraelit Benjamin Netanyahu deklaroi se Izraeli nuk e ka pranuar planin e mbështetur nga Shtetet e Bashkuara për Gazën, edhe pas marrjes së garancive se tërheqja izraelite nga territori palestinez nuk do të ndodhë pa çarmatimin e plotë të Hamasit.

Netanyahu tha se ekipi i Donald Trump besonte se mund të arrinte çarmatimin e Hamasit dhe demilitarizimin e Gazës.

“Ata na dërguan një plan, të cilin ne nuk e kemi pranuar: nuk është plani ynë. Ne ua kemi përcjellë komentet tona”, u shpreh Netanyahu.

Kryeministri izraelit u takua të hënën me “Këshillin e Paqes” të Trump, i cili është ngarkuar me zbatimin e fazës së dytë të planit të paqes për Gazën. Sipas garancive të marra, ushtria izraelite nuk duhet të braktisë pozicionet që mban aktualisht në Rripin e Gazës, rreth 60% të territorit të të cilit kontrollon, deri pas çarmatimit të plotë të lëvizjes islamiste palestineze.

Nga ana tjetër, Hamasi deklaroi të premten se pranon një marrëveshje të shpallur nga Donald Trump, e cila, sipas versionit të bërë publik nga “Këshilli i Paqes”, parashikon fundin e operacioneve ushtarake nga të dyja palët në Gaza, si dhe çarmatimin e lëvizjes islamiste palestineze, në kombinim me një tërheqje graduale të Izraelit.

Netanyahu, i cili po kërkon një mandat të ri në zgjedhjet e ardhshme parlamentare në tetor, ndodhet nën presion nga aleatët e tij të ekstremit të djathtë brenda koalicionit qeverisës. Këta të fundit e kanë kundërshtuar marrëveshjen dhe po kërkojnë një votim brenda qeverisë për ta hedhur poshtë atë.

/rtsh.al/