Fillon lirimi i hapësirave publike në segmentin e rrugës nacionale, kryqëzimi Libonik–Drithas Poshtë.

Prishjet janë duke u kryer në kuadër të investimit që Bashkia Maliq po realizon në bashkëpunim me Fondin Shqiptar të Zhvillimit për të ndërtuar një shëtitore dhe një korsi biçikletash në këtë segment, por edhe në kuadër të njoftimit që Inspektorati Kombëtar i Mbrojtjes së Territorit ka kryer për të liruar hapësirën publike.

“Duke ditur që kjo ka qenë një nga rrugët më problematike për sa i përket rrezikshmërisë së jetës së qytetarëve, dhe në kuadër të këtij investimi, Bashkia e Maliqit po liron hapësirën duke prishur ndërtimet pa leje që ndodhen në anë të rrugës. Gjithashtu jemi në bashkëpunim me qytetarët për të realizuar edhe orientimin e Inspektoratit Kombëtar të Mbrojtjes së Territorit për të liruar hapësirat publike, gjashtë metra nga aksi kryesor i rrugëve.“

Në këtë aks, në ditët në vazhdim do të ketë edhe të tjera prishje të rrethimeve apo objekteve të cilat ndodhen buzë rrugës.

/rtsh.al/