Sot ngre siparin Festivali i 64-të i Këngës në Radio Televizionin Shqiptar, eventi më i rëndësishëm i muzikës së lehtë shqiptare, i cili këtë vit vjen nën moton “Neo Albania Future”, një vizion për të ardhmen e muzikës shqiptare.

Festivali zhvillohet nga data 17 deri më 20 dhjetor në Pallatin e Kongreseve dhe premton emocione, surpriza dhe performanca spektakolare gjatë katër netëve të tij. Në natën e parë do të ngjiten në skenë 14 artistë, të cilët do të prezantohen jo vetëm përmes interpretimit të këngëve, por edhe përmes performancave skenike.

Organizatorët kanë rezervuar gjithashtu të ftuar specialë, emrat e të cilëve do të mbeten surprizë për publikun deri në nisjen e natës së parë, ndërsa përgatitjet janë në fazën finale për t’i dhënë festivalit magjinë që e karakterizon.

Në të katër netët e festivalit, publiku do të ketë mundësi të shijojë emra të njohur të muzikës shqiptare dhe ndërkombëtare. Skenaristi i festivalit, Koloreto Cukali, ka zbuluar disa nga momentet më të veçanta të këtij edicioni.

“Rikthejmë në skenë Shkodra Elektronike, një vit pas performancës që na bëri krenarë në Eurovizion. Do të kemi rikthimin e Bleona Qeretit me një performancë ekstravagante, në 30-vjetorin e këngës së saj të parë ‘Lërmëni’, e cila do të interpretohet sërish në të njëjtën skenë. Pjesë e festivalit do të jetë edhe tenori Ramë Lahaj, si dhe disa të ftuar të tjerë që do të mbeten surprizë,” u shpreh Cukali.

Prezantuese e Festivalit të 64-të do të jenë këngëtarja Arilena Ara dhe aktori i humorit Salsano Rrapi, të cilët do të drejtojnë spektaklin gjatë katër netëve ku do të garojnë gjithsej 28 këngëtarë me këngët e tyre.

Drejtoresha e RTSH-së, Eni Vasili, ka zbuluar gjithashtu të ftuarin special të natës finale. Përmes një postimi në rrjetet sociale, ajo konfirmoi se këngëtari estonez Tommy Cash, përfaqësues i Estonisë në Eurovizionin e këtij viti me këngën “Espresso Macchiato”, do të performojë në natën e katërt të festivalit.

Producentja e festivalit, Belioza Çoku, theksoi se tema “Neo Albania Future” synon të sjellë një qasje moderne dhe vizionare për muzikën shqiptare, ndërsa dirigjenti Alfred Kaçinari vlerësoi si risi kryesore përfshirjen e këngëtarëve të rinj, që përbëjnë edhe fokusin kryesor të këtij edicioni.

Struktura e festivalit parashikon që në dy netët e para të prezantohen këngët për publikun dhe jurinë, nata e tretë t’i dedikohet nostalgjisë dhe historisë së Festivalit të Këngës, ndërsa nata finale do të shpallë fituesin që do të përfaqësojë Shqipërinë në Eurovision 2026.

Biletat për ndjekjen e festivalit nga afër janë në dispozicion dhe mund të blihen vetëm online përmes platformës zyrtare www.myticket.al, ndërsa Festivali i 64-të i Këngës do të transmetohet ekskluzivisht në ekranin e RTSH-së, duke synuar të bashkojë familjet shqiptare përpara ekranit “aty ku muzika bashkon brezat”.

Artistët pjesëmarrës në Festivalin e 64-të të Këngës:

1. 2 Farm
2. Alis
3. Egzon Pireci
4. Endri Kaçaçi
5. Enxhi Nasufi
6. Erand Sojli
7. Erik Lloshi
8. Evi Reçi
9. Fifi & Tiri Gjoci
10. Frensi
11. Gerta Mahmutaj
12. Ghiti
13. Gresa Gjocera & Bledi Kaso
14. Inis Neziri
15. Kamela Islamaj
16. Kimi
17. Kleansa Susaj
18. Lorenc Hasrama
19. Luna Çausholli
20. Malvina Likaj
21. Rezarta Smaja
22. Rigersa Loka
23. Sara Kapo
24. Savjana Vjerdha
25. Sihana Haxhnikaj
26. Sheila
27. Threex
28. Vedat Ademi