Universiteti i Arteve ka çelur dyert për të rinjtë dhe dashamirësit e artit në kuadër të “Open Day”, një aktivitet që këtë vit merr një kuptim të veçantë, pasi përkon me 60-vjetorin e krijimit të Institutit të Lartë të Arteve, sot Universiteti i Arteve.

Në këtë ditë të hapur, ambientet e universitetit janë kthyer në një hapësirë të gjallë krijimtarie, ku studentët prezantojnë punët e tyre në muzikë, teatër, arte pamore dhe koreografi.

Pedagogët theksojnë se kjo nismë nuk është vetëm një urë komunikimi me maturantët që synojnë të ndjekin studimet artistike, por edhe një moment reflektimi mbi traditën dhe rrugëtimin 60-vjeçar të këtij institucioni të rëndësishëm në vend.

“Open Day” vjen kështu si një festë e artit dhe e trashëgimisë, duke rikonfirmuar rolin e Universitetit të Arteve si një vatër e rëndësishme në formimin e artistëve të rinj dhe në zhvillimin e jetës kulturore shqiptare.

Gazetare: Xhilda Kondi

/rtsh.al/