Policia e Tiranës ka zhvilluar operacionin policor të koduar “Apartamenti”, duke zbuluar dhe goditur një rast të shfrytëzimit të prostitucionit në kryeqytet.

Gjatë hetimeve të kryera nga Seksioni për Hetimin e Trafiqeve në bashkëpunim me Prokurorinë pranë Gjykatës së Shkallës së Parë Tiranë, u arrestua në flagrancë një 22-vjeçar që shfrytëzonte katër shtetase kolumbiane për prostitucion.

Në pranga përfundoi K. P., 22 vjeç, banues në Tiranë, i akuzuar për veprën penale “Shfrytëzimi i prostitucionit”. Gjithashtu, u arrestuan edhe dy shtetase kolumbiane, J. O., 20 vjeçe, dhe L. C., 27 vjeçe, për veprat penale “Mbajtja e lokaleve për prostitucion” dhe “Prostitucioni”.

Ndërkohë, për shtetaset kolumbiane K. R., 23 vjeçe, dhe A. A., 21 vjeçe, ka nisur procedimi penal për veprën penale “Prostitucioni”.

Hetimet kanë treguar se shtetasi K. P. kishte organizuar dhe shfrytëzonte për prostitucion katër shtetaset kolumbiane. Dy prej tyre kishin marrë me qira një apartament në Rrugën e Barrikadave, të cilin e kishin përshtatur për ushtrimin e kësaj veprimtarie të paligjshme.

Materialet procedurale i janë kaluar Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme.

/rtsh.al/