Partia Demokratike Popullore (PDP) në Mal të Zi ka bërë të ditur se mbështet vendimin e nënkryetares së saj, Maja Vukiçeviq, e cila është kryetare e delegacionit malazez në Asamblenë Parlamentare të Këshillit të Evropës (APKE), për të votuar kundër pranimit të Kosovës në këtë organizatë.

“Përkrahje e plotë i është shprehur nënkryetares së partisë, Maja Vukiçeviq, kryetare e delegacionit malazez në Asamblenë, që të votojë kundër pranimit të të ashtuquajturës Kosovës në Asamblenë Parlamentare të Këshillit të Evropës,” thuhet në deklaratën e kësaj partie publikuar një ditë më parë.

PDP-ja është njëra nga partitë që rezultoi pas shpërbërjes së Frontit Demokratik (FD) prorus dhe proserb dhe është pjesë e shumicës parlamentare që udhëhiqet nga Lëvizja Evropa Tani, e kryeministrit Millojko Spajiq.

Kjo parti, e udhëhequr nga Milan Knezeviq, ka qenë pro tërheqjes së njohjes së pavarësisë së Kosovës, daljes së Malit të Zi nga NATO-ja dhe heqjes e sanksioneve kundër Rusisë.

Kur u bë pjesë e qeverisë në fund të vitit të kaluar, PDP-ja u shpreh se nuk do t’i ngrinte këto çështje.

Në marrëveshjen e koalicionit me Lëvizjen Evropa Tani të kryeministrit Spajiq, palët ndër të tjera u pajtuan që Qeveria të mos merrte vendime që do të vinin në pikëpyetje pavarësinë e Kosovës, sanksionet kundër Rusisë për shkak të pushtimit të Ukrainës, dhe detyrimet ndaj NATO-s.

Gazetare: Elda Pepa

/rtsh.al/