Kampioni i botës në peshën e rëndë në artet marciale mikse, Stipe Miocic, do të mbrojë titullin këtë fundjavë. Në Las Vegas do të zhvillohet eventi UFC-252, ku Miocic do të duelojë ndaj ish-kampionitn të botës së këtij Divizioni, Daniel Cormier. Kjo është përballja e tretë mes dy sportistëve, që kanë nga një fitore secili.

Zjarrëfikësi 37-vjeçar amerikan, duke folur për këtë duel, u shpreh se është në formë dhe gati për të mbrojtur kurorën e kampionit. “Ka qenë një periudhë ndryshe nga të tjerat për shkak të pandemisë, por jam gati, jam në formë. Mes nesh nuk ka sekrete, e njohim mirë njëri-tjetrin, ndaj do të fitojë më i miri”, tha Miocic.

Miocic ka hedhur poshtë idenë se mund të tërhiqet pas kësaj sfide, cilado qoftë rezultati i saj. “Për tërheqjen kam menduar që pas duelit të parë në kafaz, në UFC-136. Pas çdo sfide mendoj për tërheqjen, por e dua këtë që bëj. Minutën e parë që nuk do të argëtohem më do të largohem. Të shohim se si do të rrjedhin ngjarjet. Rivali im është 40 vjeç dhe duelon ende”, tha Miocic.