Një ekip inspektorësh nga Agjencia Ndërkombëtare e Energjisë Atomike (IAEA) është larguar shëndoshë e mirë nga Irani për t’u kthyer në selinë e agjencisë së OKB-së në Vjenë, pasi qëndroi në Teheran gjatë luftës midis Izraelit dhe Iranit, tha sot IAEA.

Drejtori i Përgjithshëm Rafael Grossi, “përsëriti rëndësinë kritike të bashkëpunimit të IAEA-s me Iranin mbi detajet e rifillimit të aktiviteteve të nevojshme të monitorimit dhe verifikimit në Iran sa më shpejt të jetë e mundur”, tha ai në një postim në X.

Me një ligj të ratifikuar më parë këtë javë, Teherani zyrtarisht pezulloi bashkëpunimin e tij me IAEA-n.

Ligji përcakton që çdo inspektim i ardhshëm i objekteve bërthamore iraniane nga IAEA kërkon miratimin e Këshillit Suprem të Sigurisë Kombëtare të Teheranit.

Pas fillimit të luftës 12-ditore midis Izraelit dhe Iranit, Teherani kërcënoi të ndërpresë bashkëpunimin me IAEA-n, duke e akuzuar atë për mbështetje të vendeve perëndimore dhe për justifikimin e sulmeve ajrore izraelite, të cilat filluan një ditë pasi bordi i drejtorëve të Agjencisë miratoi një rezolutë që dënonte Teheranin për shkelje të detyrimeve të tij për mospërhapje.

/rtsh.al/