Besimtarët katolikë në Shkodër, kanë kremtuar meshën e vigjiljes së Pashkëve në katedralen e Shën Shtjefnit. Mesha e shenjtë është udhëhequr nga arqipeshkvi metropolit Shkodër- Pult, imzot Giovanni Peragine, i cili ka përcjellë për besimtarët mesazhin e Pashkës, mesazhin e ringjalles së Krishtit, të fitores së jetës mbi vdekjen, të së mirës mbi të keqen:

“Krishti është gjallë dhe këtë natë na thërret të gjithëve që të jetojmë si njerëz të ringjallur. Do të thotë dëshmitarë të dritës dhe dashurisë së tij”, u shpreh Imzot Giovanni Peragine, Arqipeshkëv i Shkodër- Pult.

“Urime të gjithë shqiptarëve dhe gjithmonë festofshin”

“Urime dhe mbarësi për të gjitha familjet shqiptare”, thanë disa nga besimtarët.

Me qirinj të ndezur në duar, simbol i dritës hyjnore, qindra besimtarë iu bashkuan ritualit fetar të mbrëmjes të së shtunës në Katedralen e “Shën Nikollit” në Lezhë.

Mesha e shenjtë e Ringjalljes u drejtua nga ipeshkvi i Dioqezës së Lezhës, Imzot Otavio Vitale, i cili në fjalën e tij theksoi rëndësinë shpirtërore të kësaj nate, duke e përshkruar si momentin kur besimi triumfon mbi mëkatin:

“Pashka është një ftesë e gjallë për të jetuar të sotmet me besim dhe ngjallja e Jezuit është pranë çdokujt që dëshiron paqen”, tha Imzot Otavio Vitale, Ipeshkv i Dioqezës së Lezhës.

“Mundohemi të jetë një ditë paqe në këto kohë të vështira në të gjithë botën”, tha një besimtar.

Meshat e shenjta u mbajtën në mesnatë në të gjitha kishat katolike në vend, ndërsa gjatë ditës një vend të veçantë zunë dhe vizitat e shkëmbimet e urimeve.

Gazetare: N. Spahiu    

/rtsh.al/