Shqipëria renditet e para në Ballkanin Perëndimor për nivelin e mbështetjes së qytetarëve ndaj anëtarësimit në Bashkimin Europian, sipas të dhënave të publikuara nga Komisioni Europian. 

Duke iu referuar këtyre të dhënave, Kryetari i Kuvendit, Niko Peleshi, deklaroi se “Shqiptarët vijojnë të jenë ndër mbështetësit më të vendosur të projektit europian. Me 92% mbështetje për anëtarësimin në Bashkimin Europian, Shqipëria kryeson mes vendeve kandidate për nivelin e besimit dhe përkushtimit ndaj integrimit europian.” 

Peleshi theksoi se ky besim i lartë i qytetarëve është një motivim shtesë për institucionet shqiptare: 

“Për qytetarët tanë, rruga drejt BE-së përfaqëson më shumë siguri dhe stabilitet, më shumë mundësi për zhvillim ekonomik, si dhe një perspektivë më të mirë për brezat që vijnë. Ky besim i lartë është një motivim shtesë për të vijuar me vendosmëri reformat dhe procesin e integrimit europian.” 

Sipas grafikut të Komisionit Europian, pas Shqipërisë renditet Kosova me 83% mbështetje, ndërsa Mali i Zi, Maqedonia e Veriut dhe Bosnja e Hercegovina regjistrojnë secila mbi 60%. Serbia paraqet nivelin më të ulët të mbështetjes në rajon, me vetëm 31%. 

Shqipëria vijon negociatat e anëtarësimit me BE-në, ndërsa avancimi i reformave mbetet ndër prioritetet kryesore të Qeverisë në rrugën drejt anëtarësimit të plotë. 

“Shqiptarët vijojnë të jenë ndër mbështetësit më të vendosur të projektit europian. Me 92% mbështetje për anëtarësimin në Bashkimin Europian, Shqipëria kryeson mes vendeve kandidate për nivelin e besimit dhe përkushtimit ndaj integrimit europian.”- përfundoi mesazhin e tij Peleshi.

/rtsh.al/