Situata e zjarreve në vend ka pësuar një përmirësim të ndjeshëm gjatë orëve të fundit, ku falë ndërhyrjes së koordinuar nga toka dhe ajri është bërë e mundur fikja dhe izolimi i 9 vatrave aktive në zona të ndryshme të Shqipërisë.

Përmes një përditësimi zyrtar, Ministria e Mbrojtjes bëri me dije se aktualisht nuk raportohet asnjë situatë problematike apo rrezik i drejtpërdrejtë për komunitetin dhe zonat e banuara.

Ndërhyrjet nga ajri në Dajt dhe Kavajë

Në rajonin e Tiranës, vatra e zjarrit në Malësinë e Dajtit u deklarua e fikur plotësisht pas veprimeve të përbashkëta të shërbimeve të MZSH-së, ADZM-së dhe ndihmës së helikopterit të Forcës Ajrore. Po ashtu, e shuar tërësisht raportohet edhe vatra në Priskë.

Përpjekje me intensitet të lartë u zhvilluan edhe në Çikallesh të Bashkisë Kavajë. Aty ndërhyrja e forcave zjarrfikëse nga Kavaja, Kamza dhe Rrogozhina u mbështet nga ajri me avionin e posaçëm “Air Tractor”, duke bërë të mundur izolimin e plotë të vatrës.

“Falë ndërhyrjes së koordinuar të strukturave operacionale nga toka dhe ajri, situata është përmirësuar ndjeshëm dhe aktualisht nuk raportohet asnjë situatë problematike apo rrezik për zonat e banuara.”, thuhet në njoftimin zyrtar të Ministrisë së Mbrojtjes.

Arrihet kontrolli në Klos dhe fshatrat e Jugut

Një nga pikat më kritike të ditës ishte fshati Plan i Bardhë në Bashkinë Klos, ku zjarri i favorizuar nga era kishte zgjeruar perimetrin duke rrezikuar shtëpitë dhe rrjetin elektrik. Pas angazhimit masiv të zjarrfikësve të disa bashkive, Policisë së Shtetit, vullnetarëve dhe 25 efektivëve të Forcave të Armatosura, situata u vu plotësisht nën kontroll.

Ndërkohë, në jug të vendit:

Mallakastër: Në Riban, Ngraçan dhe Panahor, zjarri është izoluar në të gjithë perimetrin.

Berat e Peqin: Vatrat në Kostren 2 (Berat) dhe Uruç (Peqin) janë shuar plotësisht.

Memaliaj: Në fshatin Alikomemaj është raportuar një vatër e re në një sipërfaqe me pisha, ku forcat e MZSH-së ndodhen në terren për izolimin e saj.

Agjencia Kombëtare e Mbrojtjes Civile (AKMC) dhe strukturat e përgjithshme të sistemit po vijojnë monitorimin e pandërprerë në të gjitha zonat e prekura për të parandaluar çdo riaktivizim të mundshëm të flakëve.

/rtsh.al/