Ministri i Jashtëm i Polonisë, Radoslaë Sikorski, deklaroi sot gjatë një vizite dyditore në Pakistan se vendi i tij dëshiron të “shfaqë flamurin” në enklavën bregdetare të Gazës, duke mbështetur një zgjidhje me dy shtete për paqen në Lindjen e Mesme.

Këtë qëndrim ai e shprehu gjatë një konference të përbashkët shtypi me homologun e tij pakistanez, Ishaq Dar, në Islamabad.

Sikorski theksoi nevojën për një strukturë qeverisëse në Gazë dhe ndihmën e komunitetit ndërkombëtar për të garantuar sigurinë bazë për banorët, në mënyrë që të fillojë rindërtimi pas dy vitesh luftë që ka lënë rreth 68,000 të vdekur dhe ka shkatërruar territorin.

“Ne e pranojmë se Gaza ka nevojë për një strukturë qeverisjeje dhe për ndihmën e komunitetit ndërkombëtar për të siguruar sigurinë bazë të banorëve të saj, që rindërtimi të mund të fillojë, dhe besoj se si Pakistani ashtu edhe Polonia do ta mbështesin këtë përpjekje,” tha Sikorski.

Duke iu referuar planit 20-pikësh të presidentit amerikan Donald Trump për Gazën, i cili parashikon një forcë të përkohshme stabilizuese për të trajnuar dhe mbështetur forcat policore palestineze, Sikorski tha se Polonia “dëshiron të shfaqë flamurin” në këtë iniciativë, pa dhënë detaje të mëtejshme. Ai vuri në dukje traditën e bashkëpunimit mes Polonisë dhe Pakistanit në misionet paqeruajtëse të OKB-së, duke shtuar se “ka një traditë të Polonisë dhe Pakistanit që marrin pjesë krah për krah në misionet e paqes të OKB-së.”

Sikorski e përshkroi iniciativën amerikane si “më tepër një nismë arabo-islamike”, por theksoi se Polonia dëshiron të tregojë mbështetjen për përpjekjet e paqes të Presidentit Trump dhe të tjerëve.

“Polonia do të dëshirojë të shfaqë flamurin të paktën, të tregojë mbështetjen tonë për përpjekjet e paqes, që luftimet të ndalojnë dhe që njerëzit të mund të rimëkëmben nga kjo situatë e tmerrshme,” shtoi ai.

Gjatë vizitës, e dyta zyrtare e Sikorskit në Pakistan pas asaj të vitit 2011, ministrat diskutuan forcimin e bashkëpunimit dypalësh në tregti, mbrojtje dhe sektorë të tjerë. Sikorski shprehu interesin e Polonisë për një “Azi Jugore të qëndrueshme dhe të prosperuar”.

“Ne e mirëpresim të gjitha përpjekjet e Pakistanit, si në nivel rajonal ashtu edhe global, që ndihmojnë në arritjen e kësaj”, tha ai.

Plani i Trump për stabilizimin e rajonit është ende në fazën e diskutimeve, por përfshin një forcë ndërkombëtare për të mbështetur policinë lokale palestineze.

Sikorski shprehu optimizëm për bashkëpunimin e mëtejshëm, duke thënë se “besoj se polakët dhe pakistanezët do të jenë sërish në të njëjtën anë në një operacion që është i rëndësishëm për të gjithë.”

/rtsh.al/