Vendosja e orkestrës në Post Fest 64 ka pasur disa rezerva në nisje, por në përgjithësi u vlerësua si funksionale nga dirigjentët pjesëmarrës.

Dirigjenti Olsi Qinami u shpreh se distanca mes muzikantëve dhe dirigjentit mund të vështirësojë komunikimin.

“Nëse muzikanti është shumë larg nga dirigjenti, komunikimi vështirësohet disi. Edhe unë kisha disa rezerva në fillim, por në fund funksionoi shumë mirë. Ka edhe disa detaje të vogla që ndoshta i vërejmë vetëm ne dirigjentët, si ndriçimi i madh apo i vogël, apo zjarri që herë pas here vinte nga pas,” tha Qinami.

Nga ana tjetër, dirigjenti Markelian Kapidani theksoi rëndësinë e arredimit dhe organizimit skenik në performancën muzikore. Ai u shpreh se, si kompozitor dhe dirigjent me përvojë edhe jashtë vendit, e konsideron orkestrën një element që e ngre materialin muzikor në tërësi.

Sipas tij, nuk pati vështirësi të mëdha, pasi orkestra është e mirë dhe ka përvojën e viteve.

“Në aspektin e orkestrës nuk ka çështje shqetësuese. Në përgjithësi gjithçka shkoi mirë,” tha Kapidani.

Ai shtoi se publiku shqiptar vazhdon të ketë dy prirje të forta muzikore, ose drejt ritmeve të fuqishme, ose drejt një melankolie të theksuar.

/rtsh.al/