Partia Socialiste ka zyrtarizuar kandidatët e saj për dy bashki të rëndësishme në kuadër të zgjedhjeve të pjesshme vendore të 9 Nëntorit 2025. Në qendër të vëmendjes ishte Asambleja e PS në Vlorë, ku deputetja Brunilda Mersini u prezantua si kandidatja për kryetare bashkie, ndërsa në Tepelenë, u bë prezantimi i Gramoz Sakos.

Mersini, “gruaja e parë” e PS-së në garën e Vlorës

Asambleja e PS në Vlorë, e drejtuar nga drejtuesi politik i qarkut, Blendi Çuçi, zyrtarizoi kandidaturën e Brunilda Mersinit.

Mersini theksoi se ishte një “privilegj i veçantë” fakti që ajo është gruaja e parë që përfaqëson Partinë Socialiste në garën për drejtimin e Bashkisë Vlorë.

Në fjalën e saj, ajo vuri theksin te ndërtimi i një bashkie më efikase, transparente dhe më pranë qytetarëve, duke u angazhuar për një Vlorë “më të zhvilluar dhe më bashkëkohore.”

Çuçi, në një postim në rrjetet sociale, shprehu besimin e palëkundur të partisë te fitorja. Ai theksoi se familja politike socialiste “s’e ka diskutuar asnjëherë fitoren në Vlorë” dhe se Mersini ka dëshmuar se “di t’i çojë përpara punët dhe të adresojë si duhet problemet e njerëzve,” duke e lidhur fushatën me vizionin “Vlora 2030.”

Mersini falënderoi qytetarët për “mbështetjen masive” dhe entuziazmin, të cilin e cilësoi si një shtysë për të dëshmuar se besimi i dhënë nuk do të shkojë dëm.

Kumbaro prezanton Sakon në Tepelenë

Paralelisht me Vlorën, u zyrtarizua edhe kandidatura në Tepelenë, ku drejtuesja politike e PS për qarkun e Gjirokastrës, Mirela Kumbaro, prezantoi, Gramoz Sakon.

Kumbaro, në postimet e saj, theksoi se kandidimi i Sakos vjen në kuadër të një procesi riorganizimi dhe me angazhim të palodhur për qytetin. Ajo vuri në dukje se transformimet e mëdha të ndodhura në Tepelenë kërkojnë tani “më shumë dinamizëm në ofrimin e shërbimeve publike, përmbushjen e pritshmërive të qytetarëve, digjitalizim, investime të qëndrueshme.”

Ajo shprehu përkushtimin e të gjitha strukturave për të ecur përpara, duke u përgjigjur sfidave dhe objektivave që i vendosen për qytetarët e Tepelenës. Këto prezantime shënojnë fillimin zyrtar të fushatës për Partinë Socialiste në dy prej garave më të rëndësishme lokale.

/rtsh.al/