Donald Trump dhe Vladimir Putin do të takohen të premten (15 gusht) në Alaskë, ndërsa presidenti rus ka përgëzuar përpjekjet e presidentit amerikan për t’i dhënë fund luftës.

Sipas agjencisë ruse TASS, Putini tha se e thirri takimin për të përcaktuar se ku qëndrojnë marrëdhëniet me administratën aktuale amerikane.

Putin lavdëroi SHBA-në për “përpjekjet mjaft energjike dhe të sinqerta për të ndaluar aktivitetet luftarake, për të ndaluar krizën dhe për të arritur marrëveshje që janë me interes për të gjitha palët e përfshira në konflikt”.

“Të krijojmë kushte afatgjata për paqe midis vendeve tona, në Evropë dhe në botë në përgjithësi”, shtoi ai.

Ndërkohë, Kremlini ka njoftuar se cilët zyrtarë do të shoqërojnë presidentin Putin në samitin e parë të liderëve SHBA-Rusi që nga viti 2021.

Delegacioni prej pesë anëtarësh përfshin: Ndihmësin presidencial Yuri Ushakov; Ministrin e Jashtëm Sergei Lavrov; Ministrin e Mbrojtjes Andrei Belousov; Ministrin e Financave Anton Siluanov; Kreun e Fondit të Investimeve Direkte Ruse Kirill Dmitriev.

Lavrov dhe Ushakov janë diplomatë veteranë që janë thelbësorë në formësimin e politikës së jashtme ruse. Lavrov ka udhëhequr ministrinë e jashtme për më shumë se 20 vjet dhe Ushakov, një këshilltar kryesor presidencial për më shumë se një dekadë, më parë ka shërbyer si ambasador i Rusisë në SHBA.

Përfshirja e Belousov dhe Siluanov sinjalizon se axhenda do të mbulojë jo vetëm luftën në Ukrainë, por edhe çështjet strategjike të sigurisë dhe çështjen e lehtësimit të sanksioneve.

/rtsh.al/