Këshilli i Ministrave ka miratuar një Vendim të ri me rëndësi strategjike për mbrojtjen dhe menaxhimin e mjedisit ujor, duke përcaktuar kërkesat detajuese për klasifikimin e statusit ekologjik të lumenjve, liqeneve, ujërave bregdetare, tranzitore dhe atyre artificialë.

Vendimi, i marrë në mbështetje të Ligjit të ri për Burimet Ujore, saktëson elementet e cilësisë, metodologjinë e vlerësimit të ndikimit njerëzor dhe standardet e cilësisë kimike për të gjitha trupat ujorë sipërfaqësorë.

Përgjegjësia kryesore i kalon AMBU-së

Në qendër të zbatimit të këtij vendimi qëndron Agjencia e Menaxhimit të Burimeve Ujore (AMBU), e cila ngarkohet me kryerjen e detyrave thelbësore:

Karakterizimi fillestar

AMBU duhet të kryejë analizën e detajuar (karakterizimin) fillestar të trupave ujorë për çdo rajon baseni lumor, sipas kërkesave të përcaktuara.

Vlerësimi i ndikimit

Agjencia do të vlerësojë ndikimin e aktivitetit njerëzor në statusin e ujërave, sipas procedurave të përcaktuara në Shtojcën II.

Vendimi përcakton gjithashtu klasifikimet e statusit ekologjik: shumë të mirë, të mirë dhe mesatar, duke përfshirë kritere specifike biologjike, hidromorfologjike dhe fiziko-kimike.

Standarde të qarta për ujërat

Për herë të parë, dokumenti përcakton qartë kriteret për cilësinë e ujërave sipërfaqësorë (lumenj, liqene, etj.), ndërsa standardet kimike do të përcaktohen sipas një procedure specifike.

Një detaj i rëndësishëm është përcaktimi që për trupat ujorë artificialë ose tepër të modifikuar, elementet e cilësisë do të jenë të njëjta me ato natyrore, vetëm në rastet kur ata përngjajnë me to.

Ndryshime ligjore dhe zbatimi

Ky Vendim sjell ndryshime edhe në një akt tjetër të rëndësishëm, duke shfuqizuar pika specifike në lidhje me statusin e ujërave sipërfaqësore në kuadër të Strategjisë Kombëtare të Menaxhimit të Burimeve Ujore.

Për zbatimin fillestar, trupat ujorë do të karakterizohen duke përdorur sistemin A të përcaktuar në Shtojcën I, derisa të sigurohen të dhënat e mjaftueshme.

Për zbatimin e Vendimit ngarkohen Agjencia e Menaxhimit të Burimeve Ujore (AMBU) dhe Agjencia Kombëtare e Mjedisit (AKM).

/rtsh.al/