Qendra Spitalore Universitare “Nënë Tereza” (QSUT) ka përcjellë sot një mesazh publik mirënjohjeje ndaj ish-Presidentit të Republikës, Alfred Moisiu.

Përmes një postimi në rrjetet sociale, institucioni më i madh shëndetësor në vend vlerësoi faktin që ish-kreu i shtetit zgjodhi të marrë shërbim mjekësor pranë stafit të tyre.

“Falënderojmë ish-Presidentin Moisiu për besimin e treguar ndaj mjekëve të QSUT! Ju urojmë shëndet të plotë dhe jetë të gjatë!”, shkruhet në mesazhin e publikuar nga QSUT.

Ish-Presidenti i Republikës, Alfred Moisiu, u shtrua pak ditë më parë në Qendrën Spitalore Universitare “Nënë Tereza” (QSUT), pas komplikacioneve shëndetësore.

Ish-kreu i shtetit u paraqit në spital me vështirësi në frymëmarrje. Menjëherë pas mbërritjes, ai është shtruar në repartin e Reanimacionit pranë Klinikës së Kardiologjisë, ku u ndodh nën monitorim intensiv nga stafi mjekësor.

/rtsh.al/