Gazetarët e radiove u mblodhën nga të gjitha trevat shqipfolëse në Gjakovë. Është edicioni i 16-të i Radiofest-it, të cilin Radio Gjakova e organizon çdo fundviti.

Materialet konkurruese, të përgatitura mjeshtërisht nga kolegët e radiove pjesëmarrëse në tre gjini: reportazh, raportim radiofonik dhe spot publicitar.

Radio Struga, nga Maqedonia e Veriut, është radioja më e re, ngritur vetëm tre muaj më parë, por gazetarja e kësaj radioje, Fitore Istrefi, u shpall zëri më i mirë radiofonik.

Radio Tirana rrëmbeu vendin e parë me radioreportazhin “O flamuri më i bukur në botë” i gazetarit Jaho Margjeka.

Ndërthurur me elemente muzikore, Radiofesti mori ngjyrat e një spektakli të ngrohtë e shumë miqësor, duke përafruar edhe më shumë përvojat e kolegëve të të gjitha radiove mbarëshqiptare.

Të gjitha materialet e prezantuara kishin veçoritë e tyre, ndaj dhe përzgjedhja ia vështirësoi punën jurisë që drejtohej nga profesor doktor Melazim Koci.

Skënder Gola, drejtor i Radio Gjakovës, si mikpritës dhe organizator, nuk harron të thotë se ky Radiofest realizohet falë bashkëpunimit mes kolegëve në të gjitha trevat.

Një interpretim nga mjeshtri gjirokastrit i monofonisë, ose siç njihet ndryshe Logjatja labë, i dha edhe më tepër ngjyra Radiofest-it.

Gazetare: Nermin Spahiu

/rtsh.al/