Kryeministri Edi Rama, bashkë me presidentin francez, Emanuel Macron, në mbarim të Samitit të Komunitetit Politik të Evropës, kanë zhvilluar mbrëmjen e së premtes edhe një vizitë te Piramida e Tiranës, për të marrë pjesë në inaugurimin e shkollës franceze të kodimit “Ecole 42”. Shkollës franceze e kodimit “Ecole 42”, është një nga shkollat më prestigjioze franceze në fushën e kodimit. Ajo është e pranishme në 31 shtete të botës, dhe nga sot do të jetë tashmë edhe në Shqipëri, si një strukturë e dedikuar drejt botës së teknologjisë.

Gjatë kësaj vizite, Rama dhe Macron biseduan me të rinjtë që janë bërë pjesë e shkollës “Ecole 42”.

Presidenti Macron është njohur me projektin, qëllimin e tij, teksa ka biseduar nga afër me drejtuesit e shkollës dhe me studentët e rinj, duke dëgjuar edhe përshtypjet e tyre.

Pasi u takua me të gjithë studentët e pranishëm, presidenti francez kërkoi edhe realizimin e një fotografie të përbashkët kortezie dhe falënderimi, duke i përgëzuar për punën e deritanishme, si dhe duke u uruar suksese të mëtejshme në këtë projekt.

“Për ti dhënë dritën jeshile “Ecole 42”, shkollës prestigjioze franceze të kodimit, e pranishme në 31 shtete, e tashmë edhe në Shqipëri, si një strukturë e dedikuar drejt botës së teknologjisë”, ka shkruar Rama në llogarinë e tij në Facebook.

/rtsh.al/