Ish-presidenti i Iranit, Mahmoud Ahmadinejad, dyshohet se ka mbetur i vrarë së bashku me truprojat e tij gjatë valës së parë të sulmeve izraelite të kryera ditën e djeshme në territorin iranian. Ky pretendim vjen nga mediat izraelite, të cilat citojnë burime të papërcaktuara brenda Iranit dhe rajonit të gjerë të Lindjes së Mesme.

Sipas raporteve paraprake të transmetuara me shpejtësi në mediat ndërkombëtare, një nga goditjet mendohet se ka pasur si objektiv zonën ku qëndronte ish-kreu i shtetit iranian. Megjithatë, deri në këto momente, autoritetet zyrtare në Teheran dhe zyra e ish-liderit nuk kanë dalë me asnjë deklaratë për të konfirmuar apo përgënjeshtruar humbjen e jetës së tij.

Nëse ky informacion vërtetohet nga burime të pavarura, do të shënonte një zhvillim dramatik dhe një përshkallëzim të paparashikueshëm në konfliktin mes Izraelit dhe Republikës Islamike. Ahmadinejad, i cili shërbeu si president i Iranit nga viti 2005 deri në vitin 2013, është një nga figurat më të njohura dhe më polarizuese të politikës iraniane, i spikatur veçanërisht për retorikën e tij të ashpër dhe të drejtpërdrejtë kundër Izraelit gjatë kohës që ishte në pushtet.

Aktualisht, situata mbetet e paqartë. Agjencitë kryesore botërore të lajmeve po e trajtojnë këtë lajm me rezerva dhe po presin një komunikim zyrtar ose pamje nga terreni për të konfirmuar fatin e 69-vjeçarit.

/rtsh.al/