Autoriteti Rrugor Shqiptar ka përfunduar rikonstruksionin e segmentit rrugor që lidh fshatin Dukat me rrugën e vjetër të Llogorasë, një aks strategjik që shërben jo vetëm për banorët e zonës, por edhe për turistët, fermerët dhe bizneset lokale.

Kryeministri Edi Rama publikoi sot në rrjetet sociale pamje nga rruga e përfunduar, duke e cilësuar këtë ndërlidhje “një bukuri më vete”. Sipas tij, rikonstruksioni i këtij segmenti është pjesë e një strategjie më të gjerë për të përmirësuar aksesin dhe për të nxitur zhvillimin ekonomik e turistik në zonat rurale të jugut të vendit.

“Ndërlidhja e rrugës së re të Dukatit dhe rrugën e vjetër të Llogorasë, një bukuri më vete”, shkruan Rama.

Ky investim jo vetëm përmirëson sigurinë dhe komoditetin e udhëtimit, por lehtëson edhe lidhjen me tunelin e Llogorasë, duke shkurtuar kohën e aksesimit drejt rivierës së jugut. Segmenti ofron pamje të bukura natyrore dhe pritet të ndikojë pozitivisht në zhvillimin e turizmit, ekonomisë lokale dhe tregtisë për banorët e zonës.

/rtsh.al/