Në kohët kur arsimi po evoluon me hapa të shpejtë dhe kërkesat për aftësi të reja po rriten dita-ditës, kurset jashtëshkollore po fitojnë gjithnjë e më shumë rëndësi.

Të konceptuara si zgjerim i të mësuarit përtej klasës tradicionale, këto programe po ofrojnë mundësi të vlefshme për fëmijët që të zbulojnë pasionet e tyre, të forcojnë aftësitë sociale dhe të përgatiten për sfidat e së ardhmes.

Nga sportet e deri te teknologjia dhe artet, aktivitetet jashtëshkollore po kthehen në një element kyç për zhvillimin gjithëpërfshirës të gjeneratës së re.

E ftuar në studion e emisionit “Mirëmëngjes Shqipëri”, në RTSH 1, mësuesja Dhurata Myrtollari thekson se kurset janë shumë të rëndësishme për të përmirësuar performancën e fëmijëve, sidomos në pjesën kur ata kanë vështirësi në konceptet në shkollë.

Me mbështetjen e institucioneve arsimore dhe komunitetit, kurset jashtëshkollore mund të shndërrohen në një pjesë të pandashme të rrugëtimit arsimor të çdo fëmije.

“Kurset janë shumë të rëndësishme për të përmirësuar performancën e fëmijëve sidomos në pjesën kur fëmijët kanë vështirësi në konceptet në shkollë. Përveç se është një vlerë e shtuar kurset janë shumë të rëndësishme që fëmijët të ndërtojnë një lloj shoqërie dhe të kalojnë kohën në mënyrë më të organizuar”, u shpreh mësuese Dhurata Myrtollari.

Mësuesja Myrtollari thekson se shpesh herë, në përvojën e saj, është vënë re një prirje për t’u dhënë më shumë rëndësi lëndëve bazë , ndërsa lëndët e aftësive si muzika dhe artet anashkalohen duke theksuar se aktivitetet krijuese janë po aq të vlefshme për mirëqenien emocionale dhe motivimin e nxënësve.

Ndërkohë që roli i prindërve në procesin edukativ është i padiskutueshëm, Myrtollari nënvizon rëndësinë e mbështetjes së specializuar.

“Nga përvoja e mësimdhënies ka mësues që duke i dhënë më shumë rëndësi lëndëve bazë siç janë matematika, gjuha, provimet apo ngarkesa shpesh herë pjesa e lëndëve së aftësive siç janë artet, muzika etj, nuk e kuptojnë sa e rëndësishme është ajo orë që fëmijët mezi e presin. Lidhja prind fëmijë është e padiskutueshme dhe nuk mund të diskutojmë ndikimin e madh pozitiv të prindërve sepse është i pari që merret me të gjithë ngarkesën por mbështetje të specializuar jep specialisti në momentin që fëmijët nuk kuptojnë ose kanë vështirësi në bërjen e detyrave. E rëndësishme është që fëmija të ndihet mirë dhe ti kuptojë, në momentin që i ka të paqarta njohuritë çdo mësues ka detyrimin parësor t’ia shpjegoj fëmijës, kur fëmija ka nevojë për një shpjegim më të detajuar prindërit i drejtohen kurseve por ama duhet të shikojnë se sa mësimdhënie cilësore u jepet në ato kurse”, u shpreh Myrtollari.

/rtsh.al/