Numri i divorceve në qarkun e Korçës ka pësuar rritje, duke reflektuar problematika të shumta sociale dhe ekonomike me të cilat përballen familjet.

Sipas avokatit Esmerald Xhafa, pjesa më e madhe e kërkesave për zgjidhje martese paraqiten nga gratë, të cilat shpesh përballen me vështirësi të theksuara në jetën familjare.

“Në vitin 2025 janë regjistruar gjithsej 674 kërkesa për zgjidhje martese. Ky numër i lartë lidhet edhe me faktin që Gjykata e Shkallës së Parë me juridiksion të përgjithshëm në Korçë trajton gjithashtu edhe çështjet që i përkisnin më parë Gjykatës së Pogradecit. Si pasojë, vihet re një rritje e numrit të kërkesave.

Sa i përket vendimeve të dhëna gjatë vitit 2025, gjykata ka dhënë 399 vendime për zgjidhje martese. Ndërkohë, vetëm në tremujorin e parë të vitit janë regjistruar rreth 97 vendime për zgjidhje martese”, tha Xhafa.

Xhafa thekson se faktorët ekonomikë mbeten ndër arsyet kryesore që ndikojnë në prishjen e marrëdhënieve, duke sjellë tensione dhe konflikte të vazhdueshme mes partnerëve.

Mungesa e të ardhurave të qëndrueshme dhe kostot në rritje të jetesës po ushtrojnë presion mbi familjet, duke çuar në raste të shumta deri në zgjidhjen përfundimtare të martesës.

“Këto raste lidhen kryesisht me probleme ekonomike, të cilat me kalimin e kohës reflektohen edhe në marrëdhënien mes bashkëshortëve. Vështirësitë financiare shpesh shndërrohen në mospërputhje karakteri, debate të vazhdueshme dhe mosdakordësi lidhur me mënyrën e jetesës, duke ndikuar drejtpërdrejt në prishjen e marrëdhënies bashkëshortore”, nënvizoi ai.

Më tej, avokati shpjegon se mungesa e komunikimit dhe e mbështetjes reciproke mes bashkëshortëve përkeqëson situatën, duke e bërë më të vështirë zgjidhjen e problemeve brenda familjes.

Gazetare: Geralda Manushi

/rtsh.al/