Bursa Shqiptare e Energjisë ALPEX ka shënuar një rritje të ndjeshme përgjatë 2025. Volumet e tregtuara të energjisë në bursë regjistruan një rritje prej 42.46% krahasuar me një vit më parë.

Në raportin vjetor të ALPEX vërehet se vlera totale e transaksioneve të blerje-shitjes së energjisë arriti në 369.46 milionë euro, ndërsa çmimi mesatar u regjistrua në 118.38 €/MWh.

“Kjo rritje tregon zgjerimin e tregut të energjisë dhe rritjen e pjesëmarrësve në bursë. Ajo sinjalizon gjithashtu edhe rritjen e besimit tek tregtimi, tregu i organizuar dhe transparenca e tregut”, tha eksperti Gordani.

Sipas ekspertit Gordani, çmimi mesatar flet për kushtet e tregut rajonal si dhe ndikimin e kërkesës dhe ofertës për energjinë.

“Ai është një tregues i stabilizimit relativ të çmimeve, krahasuar me periudhën e krizës energjetike në Evropë”, tha eksperti.

Roli i ALPEX, sipas Gordanit, ka sjellë rritje të fleksibilitetit dhe konkurrencës në tregun rajonal të energjisë.

“ALPEX ndihmon në lidhjen e tregjeve, në këtë rast atë të Shqipërisë me Kosovën dhe rajonin, pra përmes platformave të përbashkëta të tregtimit”, tha ai.

Gjithashtu, Gordani thekson se funksionalizimi i ALPEX po mundëson një balancim më të mirë të energjisë në kohë reale, duke integruar burime të ndryshme të energjisë.

Gazetar: Omer Saraçi

/rtsh.al/