Numri i operacioneve të inteligjencës ruse në Evropë ka shënuar një rritje dramatike, duke kaluar nga vetëm tre raste në vitin 2021 (para pushtimit të Ukrainës) në më shumë se 40 operacione në vitin 2024. Kjo shifër alarmante vjen nga një studim i Universitetit holandez të Leidenit, i cili nxjerr në pah një strategji gjithnjë e më agresive të Moskës, që përfshin akte sabotimi, propagandë dhe madje edhe vrasje.

Drejtuesi i projektit studimor, Bart Schuurman, e sheh këtë studim si një “thirrje zgjimi” për politikën në Evropë. Schuurman, ekspert i sigurisë dhe drejtues i Grupit të Kërkimit për Terrorizmin dhe Dhunën Politike në Universitetin e Leidenit, paralajmëron se Rusia nuk është përgjegjëse vetëm për “dëmet e konsiderueshme në infrastrukturën evropiane të energjisë dhe telekomunikacionit”, por edhe për “sulme terroriste ndaj aviacionit civil dhe kërcënimeve ndaj shërbimeve publike që mund të rrezikojnë mijëra njerëz”.

Spektri i gjerë i kërcënimeve dhe “agjentët e disponueshëm”

Një shembull konkret i këtij rreziku është sulmi me zjarrvënie ndaj një kontejneri ajror mallrash të kompanisë gjermane të logjistikës DHL, pak para se të ngarkohej në një aeroplan. Ky incident tregon se organizatorët e dyshuar rusë janë të përgatitur të pranojnë rrezikun e lëndimeve personale.

Gerhard Conrad, një ish-agjent i Shërbimit Federal të Inteligjencës Gjermane (BND), thekson në një intervistë me DW se Rusia, ashtu si në Luftën e Ftohtë, po përdor të gjithë gamën e masave të inteligjencës. Qëllimet janë “frikësimi i popullsisë” dhe “aktivitetet spiunazhi kundër objektivave ushtarakisht të rëndësishëm, nga industria e armëve deri te bazat e Bundeswehr-it”.

Një fenomen i ri dhe shqetësues, sipas Conrad, është rekrutimi i të ashtuquajturve “agjentë të disponueshëm”. Këta janë shpesh simpatizantë të Rusisë, të rekrutuar në vendet e BE-së për para, me qëllim shkaktimin e trazirave. Dëmi për shërbimet e inteligjencës ruse, nëse agjentë të tillë ekspozohen, është minimal.

Në Gjermani, para zgjedhjeve për Bundestagun, është vënë re një rritje e veprimeve të tilla ilegale nga sabotatorë jo-profesionistë. Rusia po rekruton spiunë amatorë edhe për të spiunuar bazat ushtarake duke përdorur dronë.

Nevoja për përgatitje afatgjatë

Ish-agjenti Conrad paralajmëron se kërcënimi në rritje nga Rusia ka qenë i dukshëm jo vetëm që nga viti 2022, por “më së voni që nga viti 2014”, kur Rusia aneksoi Krimenë dhe dërgoi trupa në Donbas.

Ai është i bindur se njerëzit në Evropë duhet të jenë të vetëdijshëm se kërcënimi nga Rusia nuk do të marrë fund shpejt. Gjermania dhe Evropa duhet të përgatiten për një “mbrojtje kundër kërcënimeve hibride” afatgjatë.

Kjo përfshin jo vetëm përmirësimin e aftësive ushtarake, por edhe forcimin e shërbimeve të inteligjencës.

“Për ta bërë këtë, atyre u duhet shumë personel, u duhen shumë mundësi teknike, madje edhe mundësi ligjore, për të identifikuar këto struktura, këto modele sulmi, që në fillim,” shpjegon Conrad, duke theksuar se vetëm në këtë mënyrë sulmet hibride të Rusisë mund të zbulohen që në fazat e para.

/rtsh.al/