Të dhënat më të fundit nga INSTAT për vitin 2025 sjellin një panoramë interesante të rrugëve shqiptare: trafiku është rënduar me më shumë mjete se kurrë më parë, por siguria rrugore është përmirësuar ndjeshëm.

Të enjten (27 Nëntor 2025), INSTAT publikoi bilancin e transportit dhe aksidenteve, duke konfirmuar se numri i mjeteve në qarkullim ka kaluar pragun të 1 milionëshit, duke arritur në 1,025,981 mjete.

Më shumë makina, Volkswagen dominon tregun e ri

Krahasuar me një vit më parë, flota e automjeteve në Shqipëri është rritur me 9.2%. Tirana mban “pjesën e luanit” të trafikut, me rreth 35% të të gjitha mjeteve të vendit, ndjekur nga Durrësi. Në të kundërt, qarqet me më pak mjete mbeten Gjirokastra dhe Kukësi.

Një surprizë vjen tek preferencat e shqiptarëve për makinat që regjistrojnë për herë të parë (importi i ri). Ndonëse historikisht vendi ka pasur një “dashuri” për Mercedes-Benz, në tremujorin e tretë 2025, Volkswagen ka zënë vendin e parë me 19.8% të regjistrimeve të reja, duke lënë pas Mercedes-Benz me 17.0%.

Paradoksi, shtohen makinat, pakësohen aksidentet

Pavarësisht se rrugët janë më të mbushura, numri i aksidenteve ka pësuar një rënie drastike. Për periudhën Janar-Tetor 2025, aksidentet janë ulur me 16.5% krahasuar me vitin 2024.

Në Tetor 2025 u regjistruan 116 aksidente (nga 142 që ishin vjet).

Edhe numri i viktimave dhe të plagosurve për 10-mujorin ka rënë me mbi 14%.

Statistikat kanë zbuluar edhe profilin e shoferit dhe kohës më të rrezikshme për të udhëtuar:

Në 81% të rasteve, fajtorë janë shoferët dhe jo rruga apo këmbësorët.

Mosha problematike janë të rinjtë e moshës 25-34 vjeç, të cilët janë shkaktarët kryesorë të aksidenteve. Ata zënë rreth 26% të rasteve.

E premtja është dita me numrin më të lartë të aksidenteve, ndërsa e marta është më e sigurta.

Ora e pikut është gjatë orarit 08:00 – 12:00, pasi atëherë ndodhin 1/4 e përplasjeve.

Harta e rrezikut

Ndërsa Tirana ka numrin më të lartë të aksidenteve për shkak të volumit (433 aksidente në 10 muaj), vlen të theksohet edhe situata në Lezhë, e cila raporton një numër shumë të lartë të aksidentuarish (152 persona), duke ia kaluar edhe qarqeve më të mëdha si Durrësi apo Vlora, të cilat kanë shënuar ulje të ndjeshme.

/rtsh.al/