Policia e Sarandës ka finalizuar operacionin e koduar “Administratori”, duke goditur një rast të armëmbajtjes pa leje dhe një rast të dyshuar të shitjes së lëndëve narkotike.

Në kuadër të kontrolleve të ushtruara në ambiente dhe subjekte të ndryshme të qytetit, bazuar edhe në informacionet e siguruara në rrugë operative, shërbimet e Policisë arrestuan në flagrancë shtetasin A. H., 37 vjeç, banues në Sarandë.

Gjatë kontrollit në lokalin që ai administronte, në lagjen nr. 4 të Sarandës, si dhe gjatë kontrollit fizik ndaj tij, uniformat blu gjetën dhe sekuestruan një armë zjarri pistoletë me një krehër me 7 fishekë, si dhe një sasi lënde narkotike të dyshuar kokainë, e cila dyshohet se mbahej me qëllim shitjen.

Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Sarandë për veprime të mëtejshme hetimore.

/rtsh.al/