Një vendim i fundit i qeverisë serbe ka lënë pa mbështetje financiare mijëra shqiptarë që jetojnë në Luginën e Preshevës. Kreu i Këshillit Kombëtar Shqiptar, Enkel Rexhepi, njoftoi se Beogradi ka bllokuar transfertat dhe donacionet që vijnë direkt nga Kosova. Ky bllokim nuk është një problem teknik, por një goditje e drejtpërdrejtë për 3650 nxënës dhe qindra fëmijë jetimë.

“Po preken qindra studentë, rreth një mijë bujq dhe mbi 130 organizata që varen totalisht nga këto programe zhvillimi”, denoncoi publikisht Rexhepi. Sipas tij, pengesa po bëhet përmes sistemit bankar me urdhër të qartë politik nga autoritetet e larta serbe.

Reagimi i Prishtinës ka qenë i menjëhershëm, duke e cilësuar këtë si një ndërhyrje të dhunshme në funksionimin e institucioneve shqiptare. “Kjo është hera e dytë që mjetet tona pengohen pa asnjë arsye, duke treguar një model të përsëritur bllokimi”, deklaroi Qeveria e Kosovës.

Kabineti qeveritar konfirmoi se ka nisur hapat konkretë për të vënë në lëvizje ndërkombëtarët lidhur me këtë situatë. Brukseli dhe faktorët e tjerë relevantë janë njoftuar zyrtarisht për këtë shkelje që cenon identitetin kombëtar të shqiptarëve në Luginë.

Gazetar: A. Mata

/rtsh.al/