Ky sezon veror po shënon një rritje të ndjeshme të numrit të vizitorëve në zonat turistike të qarkut të Shkodrës, duke vendosur përpara institucioneve vendore një sërë sfidash për menaxhimin e fluksit dhe garantimin e një shërbimi sa më cilësor.

Për Administratën rajonale të Zonave të Mbrojtura, një nga sfidat kryesore mbetet rritja e sigurisë së vizitorëve, sidomos në zonat malore.

Në këtë drejtim, vëmendja është përqendruar te orientimi i vizitorëve dhe krijimi i kushteve më të sigurta për lëvizjen në terrenet malore.

“Një element i cili është vënë re këto vitet e vitin e fundit ka qenë rritja e sigurisë, kjo sepse shumë turistë, mbas thirrjeve tona të vazhdueshme, i realizojnë vizitat me guida të licencuara, që do të thotë kemi pasur më pak incidente në pjesën e Alpeve. Nuk mund të harrojmë asnjëherë se apeli kryesor jonë është që të kemi kujdes në shtigjet malore të cilat janë të pamarkuara”, tha Agim Dardha, Drejtues i ADZM Shkodër.

Por sfidat nuk lidhen vetëm me zonat malore. Rritja e numrit të turistëve edhe ne bregdetin e Velipojës dhe Liqenin e Shkodrës kërkon më shumë angazhim. Për strukturat e turizmit në Bashkinë Shkodër, prioritet mbetet mirëmbajtja e territorit, krahas përmirësimit të cilësisë së shërbimeve.

“Flukset turistike kanë edhe ato problemet e veta. Sfidë kryesore është edhe ruajtja dhe mbajtja e pastër ambientit, sidomos në këto zonat turistike. Në këtë drejtim janë shtuar intervalet pastruese të këtyre zonave turistike. Pjesa tjetër është edhe cilësia e shërbimeve sepse siç e dimë në flukset e mëdha duhet të jemi gjithmonë në kërkim të rritjes së cilësisë”, tha Renato Lumçi, Drejtor i Turizmit , Bashkia Shkodër

Mbi 570 mijë vizitorë kanë frekuentuar zonat turistike të qarkut gjatë shtatë muajve të parë të këtij viti. Fluksi më i lartë është regjistruar në Parkun Kombëtar të Alpeve, me qendër Thethin, që mbetet destinacioni më i kërkuara turistike në veri të vendit

Gazetar: A.Hoti    

/rtsh.al/