Shtetet e Bashkuara së shpejti do të fillojnë të lëshojnë pasaporta speciale me fotografinë e Presidentit Donald Trump, në kuadër të festimeve për 250-vjetorin e pavarësisë së Amerikës, tha një zyrtar i Departamentit të Shtetit.

Sipas zyrtarit të Departamentit të Shtetit, pasaportat e reja do të jenë të disponueshme për qytetarët që rinovojnë dokumentin personalisht në Zyrën e Pasaportave në Washington. 

Sipas zyrtarëve, pasaportat do të ruajnë të gjitha elementet e sigurisë, por do të përfshijnë dizajn të personalizuar dhe vepra arti përkujtimore.

Në maketet e publikuara, fytyra dhe firma e Trump me ngjyrë ari shfaqen në kopertinën e brendshme, ndërsa kopertina e pasme paraqet një imazh nga piktura e John Trumbull “Deklarata e Pavarësisë”. 

Zëdhënësi i Departamentit të Shtetit, Tommy Pigott, tha se pasaportat përkujtimore do të jenë të kufizuara në numër dhe do të dalin këtë verë.

 “Këto pasaporta do të kenë vepra arti të personalizuara dhe imazhe të përmirësuara, duke ruajtur të njëjtat karakteristika sigurie që e bëjnë pasaportën amerikane dokumentin më të sigurt në botë,” u shpreh ai. 

Aktualisht, pasaportat amerikane paraqesin brenda kopertinës pikturën e Percy Moran për Francis Scott Key pas bombardimit të Fort McHenry, ngjarje që frymëzoi himnin kombëtar.

Departamenti i Brendshëm, i cili mbikëqyr parqet kombëtare, njoftoi vitin e kaluar se do të zbulonte “dizajne të reja përkujtimore” për lejet e hyrjes në park, njëra prej të cilave përshkruan fytyrën e Trump pranë George Washington.

Vitin e kaluar, emri i Trump iu shtua gjithashtu Qendrës Kennedy dhe Institutit Amerikan të Paqes.