Kreu i Agjencisë së Kombeve të Bashkuara për Refugjatët Palestinezë (UNRWA), Philippe Lazzarini, ka dënuar ashpër një sulm izraelit ndaj një spitali në Gazë, i cili la të vdekur të paktën 20 persona, përfshirë pesë gazetarë.

Lazzarini e përshkroi sulmin si një akt që “hesht zërat e fundit që kishin mbetur e që raportonin për fëmijët që po vdesin në heshtje mes urisë në Gaza”.

Në një postim në platformën X, Lazzarini shprehu zhgënjimin e tij të thellë ndaj indiferencës dhe mosveprimit të komunitetit ndërkombëtar, duke e quajtur atë “shokuese”.

Sulmi, i cili ka shtuar bilancin e viktimave në konfliktin e vazhdueshëm në Gazë, ka nxitur shqetësime të mëdha për sigurinë e civilëve dhe punonjësve të medias në zonën e konfliktit.

Lazzarini theksoi se situata humanitare në Gazë po përkeqësohet çdo ditë, me fëmijë dhe familje që përballen me uri dhe mungesë të ndihmave bazë.

Ai bëri thirrje për veprim urgjent nga bashkësia ndërkombëtare për të adresuar krizën dhe për të mbrojtur jetët e pafajshme.

Ky sulm vjen në një kohë kur tensionet në rajon mbeten të larta, dhe UNRËA vazhdon të luajë një rol kyç në ofrimin e ndihmave humanitare për refugjatët palestinezë.

Megjithatë, agjencia përballet me sfida të mëdha për shkak të dhunës së vazhdueshme dhe kufizimeve në qasjen ndaj zonave të prekura.

Komuniteti ndërkombëtar është kritikuar vazhdimisht për mungesën e një përgjigjeje të unifikuar dhe efektive ndaj krizës në Gaza. Lazzarini u bëri thirrje liderëve botërorë të marrin përgjegjësi dhe të ndërmarrin hapa konkretë për të ndalur dhunën dhe për të lehtësuar vuajtjet e popullsisë civile.

/rtsh.al/