Përmirësimi dhe shtimi i vazhdueshëm i shërbimeve tatimore elektronike po e bën më të lehtë mbarëvajtjen e punëve të biznesit dhe të qytetarëve.

Drejtoria e Tatimeve bën të ditur se në gjashtë muajt e parë të vitit, një ndër shërbimet më të përdoruara nga bizneset është vërtetimi i pagesës së detyrimeve, i shkarkuar në total 171.023 herë.

Ky shërbim dhe të tjerë i kanë ndihmuar tatimpaguesit, duke u kursyer kohë dhe duke shmangur burokracitë.

Për ekspertin Avni Tobli nevojitet ende një punë e vazhdueshme në terren në luftën ndaj informalitetit.

“Kjo është një arritje, por prapë është numër shumë i vogël. Po të llogarisim sa apartamente kemi në Tiranë që jepen nga individët, është i papërfillshëm. Rritja e numrit të deklarimeve është presioni që ushtron administrata tatimore mbi tatimpaguesit,” thotë z. Tobli.

Sipas ekspertit kontabël, problem mbeten momentet e fluksit të lartë të kërkesave në sistem.

“Në qoftë se përdoret nga shumë tatimpagues njëherësh atëherë ngadalësohet marrja e shërbimit,” shpjegon ai.

Eksperti Erion Muça mendon se sistemi kontribuon ndjeshëm në formalizimin e marrëdhënies punëdhënës-punëmarrës.

“Sigurisht kjo i bën më korrektë punëdhënësit, që pasqyrojnë online të gjithë raportin e marrëdhënies së punës,” shton z. Muça.

Drejtoria e Tatimeve bën të ditur se sistemi në qershor 2025 pati rreth 14.770 më shumë punonjës të deklaruar krahasuar me qershorin 2024, tregues i qartë i formalizimit të tregut të punës.

Gazetar: Omer Saraçi

/rtsh.al/