Në një fazë vendimtare për rrugëtimin evropian të Shqipërisë, Kuvendi ka organizuar edicionin e dytë të “Ditës së Kërkimit Parlamentar”, duke vënë theksin te roli i ekspertizës dhe analizës së thelluar në procesin e ligjvënies.

Aktiviteti, i mbajtur nën temën “Roli i Parlamentit në Procesin e Anëtarësimit në BE”, bëri bashkë deputetë, ambasadorë dhe studiues, në një organizim të Institutit Parlamentar në bashkëpunim me NDI dhe me mbështetjen e Ambasadës së Zvicrës.

Gonzato: Mbyllja e kapitujve, më e vështirë se hapja

Sipas njoftimit për shtyp të Kuvendit, ambasadori i BE-së, Silvio Gonzato, përcolli një mesazh të qartë për politikën shqiptare. Ai theksoi se në këtë fazë të çeljes së grup-kapitujve, roli i ekspertëve dhe analistëve – sado i padukshëm – është jetik për të përkthyer të dhënat në veprim politik.

“Ata që qëndrojnë pas demokracisë parlamentare, analistët, ekspertët, nuk janë shumë popullorë këto ditë, por janë ata që përkthejnë dijen në veprim politik. Hapja e kapitujve është arritje, por mbyllja e kapitujve negociues është më e vështirë se çelja e tyre,”, paralajmëroi Gonzato, duke kërkuar vendimmarrje të bazuar në fakte.

Ambasadorja e Zvicrës, Ruth Huber, e cila mbështet financiarisht rritjen e kapaciteteve kërkimore të Kuvendit, e cilësoi këtë moment si historik për Shqipërinë.

“Në një kohë kur vendimmarrja kërkon më shumë prova dhe të dhëna, ndërtimi i kapaciteteve të forta kërkimore brenda parlamentit është thelbësor,”,  u shpreh Huber, sipas njoftimit për shtyp.

Zëvendëskryetarja e Kuvendit, Klodiana Spahiu, dhe deputeti Erion Malaj nënvizuan se kërkimi parlamentar po kthehet në një standard për transparencën dhe harmonizimin e legjislacionit me atë të BE-së. Malaj theksoi se objektivi madhor mbetet anëtarësimi në familjen evropiane brenda vitit 2030.

Aktiviteti vijoi me panele teknike të moderuara nga deputetet Iris Luarasi, Greta Bardeli dhe Ina Zhupa. Studiues dhe ekspertë prezantuan punime shkencore mbi tema të nxehta si:

Përdorimi i Inteligjencës Artificiale në parlament.

Digjitalizimi i shërbimeve juridike.

Lufta kundër pastrimit të parave.

Punësimi i të rinjve dhe liria e medias.

/rtsh.al/