Shtëpia e Bardhë ka hedhur poshtë me forcë një raport të medias shtetërore iraniane, i cili pretendonte se kishte zbuluar detaje të një drafti të Memorandumit të Mirëkuptimit (MoU) midis Shteteve të Bashkuara dhe Iranit për t’i dhënë fund konfliktit aktual.

“Ky raport nga media e kontrolluar nga Irani nuk është i vërtetë dhe MoU-ja që ata ‘publikuan’ është një fabrikim i plotë. Askush nuk duhet të besojë atë që media shtetërore iraniane po shpërndan. “Faktet kanë rëndësi”, shkroi Shtëpia e Bardhë në platformën X.

Sipas Televizionit Shtetëror iranian (IRIB) dhe agjencive të lidhura si Mizan, drafti i supozuar i MoU-së përfshinte pikat kryesore të mëposhtme: Tërheqja e forcave amerikane nga afërsia e Iranit, heqja e bllokadës detare të porteve iraniane nga ana e SHBA-së.

Në këmbim, Irani do të rivendoste transportin tregtar nëpër Ngushticën e Hormuzit në nivelet para luftës brenda një muaji.

Irani do të vazhdonte të menaxhonte trafikun e anijeve nëpër Hormuz (në bashkëpunim me Omanin), duke përjashtuar anijet ushtarake – një zhvillim që do të konsiderohej fitore e madhe për Teheranin.

Dokumenti nuk ishte ende final dhe Irani nuk do të ndërmerrte hapa pa “verifikim të prekshëm”. Nëse do të arrihej marrëveshja finale brenda 60 ditëve, mund të miratohej si rezolutë e Këshillit të Sigurimit të OKB-së.

Raporti iranian e paraqiste këtë si një kuadër fillestar jozyrtar për një proces paqeje më të gjerë.

Ky incident ndodh në mes të negociatave të vazhdueshme midis Uashingtonit dhe Teheranit për t’i dhënë fund luftës që nisi në fund të shkurtit 2026 pas sulmeve amerikane dhe izraelite ndaj Iranit.

Ngushtica e Hormuzit, përmes së cilës kalon rreth 20% e naftës botërore, është bërë një pikë kritike pasi Irani kufizoi lëvizjen e anijeve, duke çuar në rritje të çmimeve të naftës.

Shtëpia e Bardhë ka insistuar se nuk ka asnjë marrëveshje të tillë dhe se media iraniane po shpërndan informacion të rremë.

Ndërkohë, burime të tjera perëndimore raportojnë se negociatat për një memorandum të shkurtër (një faqe) janë në vazhdim, por ende nuk ka arritur asgjë konkrete, sidomos për çështjet bërthamore.

/rtsh.al/