Shoqata e Bankave sinjalizon një shtim të numrit të krimeve kompjuterike nëpërmjet internetit dhe u bën thirrje qytetarëve të tregojnë një kujdes më të madh në përdorimin e të dhënave personale dhe bankare në internet. 

Spiro Brumbulli, Sekretar i Përgjithshëm i Shoqatës së Bankave, tregon se rastet e raportuara ndahen në tri tipologji kryesore. 

“E para është oferta joshëse nga tregtarë të rremë. Kemi tregtarë të rremë, ku paraqitja vjen sikur është një dyqan që e bën, por në fakt është thjesht një imazh i atij dyqani dhe më pas janë të gjitha faqet e rreme. Dhe e treta është mesazhet joshëse. Marrësi i mesazheve duhet të kryejë dhe disa veprime të tjera për të përfituar edhe shërbime të caktuara”, tha ai.

Sipas Brumbullit, vërehet një sofistikim i krimit në kohët e fundit. 

“E veçanta e këtyre skemave në dallim me vitet e mëparshme është se janë sofistikuar nga pikëpamja estetike dhe asaj që projektohet. Veprimi realisht kryhet si për çdo veprim tjetër të vërtetë, vetëm se faqja është e rremë dhe fondet adresohen aty ku duan mashtruesit”, theksoi Brumbulli.

Shoqata ka disa rekomandime për përdoruesit në rastet kur dyshohet apo konstatohet se keni rënë pre e këtyre veprimeve. 

“Të qëndrojmë të gjithë sëbashku duke i fshirë, duke mos i pranuar, duke sinjalizuar Bankën si masa të para emergjente për të mos rënë pre e këtyre skemave mashtruese”, apeloi ai.

Gjithashtu, Shoqata u kërkon përdoruesve që në asnjë rast të mos japin të dhënat e tyre personale dhe bankare kur këto kërkohen nëpërmjet email, SMS, ose telefonatash, pasi me shumë mundësi këto janë përpjekje për mashtrim.

/rtsh.al/