Në shtatë ditët e fundit, Njësia Policore Detare dhe Policia Kufitare, nga Komani në Ksamil, ka kontrolluar 321 mjete lundruese, nga të cilat 20 janë bllokuar për shkelje të ndryshme.

Efektivët blu, teksa kanë monitoruar hapësirën detare, liqenore dhe lumore, me qëllim rritjen e parametrave të sigurisë, kanë bllokuar 11 jet ski, 5 skafe, 3 gomone dhe 1 varkë metalike me motor uji të instaluar.

Tetë prej mjeteve lundruese janë konstatuar duke lundruar brenda perimetrit të sigurisë, duke rrezikuar jetën e pushuesve. Drejtuesit e tyre u ndëshkuan me masë administrative prej 100.000 lekësh secili.

Gjithashtu, janë shpëtuar në det 38 shtetas (shqiptarë dhe të huaj) dhe 17 mjete lundruese.

Policia Kufitare apelon për respektimin me rigorozitet të rregullave të përdorimit të mjeteve lundruese ndërsa shton se, pushuesit nuk duhet të ndërmarrin iniciativa lundrimi me mjete të vogla kur kushtet e motit nuk janë të favorshme.

Gazetare: Flutura Tota

/rtsh.al/