Ministria e Mbrojtjes ka raportuar se, nga 13 vatra zjarri të regjistruara sot, 7 mbeten ende aktive, ndërsa 6 janë shuar plotësisht. Forcat në terren dhe ndërhyrjet ajrore vazhdojnë punën intensive në disa qarqe të vendit.

Zjarret aktive dhe masat e marra

Qarku Vlorë: Zjarri në fshatin Navaricë ka ndryshuar drejtim, ndërsa në Leshnicë e Poshtme dhe Tragjas, ndërhyrja ajrore dhe forcat në terren kanë shmangur rrezikun për banesat. Operacionet po mbështeten nga një helikopter i Forcës Ajrore dhe dy avionë suedezë “Fireboss”.

Qarku Fier: Në Lofkënd të Mallakastrës, dy vatra zjarri janë riaktivizuar dhe po luftohen nga ajri me avionin kroat “Canadair”, pasi terreni është i vështirë për operacione nga toka.

Qarku Lezhë: Në Malaj Epërm, Mirditë, po digjen rreth 10 hektarë pyje me pisha dhe lis. 33 forca lokale po punojnë për të krijuar breza ndarës për të ndaluar përhapjen e flakëve.

Qarku Dibër: Një zjarr i riaktivizuar në Mali i Allushit, Klos, është vënë nën kontroll dhe nuk rrezikon banesat.

Qarku Tiranë: 15 efektivë të MZSH po punojnë për të shuar një zjarr në malin e Bërzhitës, i cili nuk rrezikon zonat e banuara.

Qarku Elbasan: Zjarri në Lleshaj, Gramsh, është izoluar plotësisht dhe po mbahet nën monitorim.

Ministria e Mbrojtjes u bën apel qytetarëve për kujdes maksimal dhe bashkëpunim me forcat në terren për të parandaluar dëmet në jetë dhe prona.

/rtsh.al/