Në Dibër vijojnë aksionet për shuarjen e zjarreve, të cilat kanë përfshirë disa zona malore, mes tyre Lura dhe Zall-Gjoçaj.

Nga Dibra, Ministri i Mbrojtjes, Pirro Vengu bëri të ditur se janë mobilizuar forca shtesë në terren, ndërsa ndërhyrja nga ajri, si nga Forcat e Armatosura shqiptare ashtu edhe nga ato italiane, ka ndihmuar në uljen e intensitetit të flakëve.

Ministri thekson se nuk ka rrezik për zonat e banuara, ndërsa thotë se strukturat e emergjencës mbeten në gatishmëri të plotë për të ndjekur nga afër çdo zhvillim.

“Në Dibër, ku kemi mobilizuar forca shtesë në aksionet për shuarjen e zjarreve. Ndërhyrja nga ajri, nga forcat tona dhe ato italiane, ka mundësuar uljen e intensitetit të vatrave, veçanërisht në Lurë dhe në zonën e Zall Gjoçajt.

Fatmirësisht nuk ka rrezik për zonat e banuara, por jemi në terren për të ndjekur hap pas hapi çdo situatë.

Gjatë pasdites, ndërhyrja e shpejtë e Forcave të Armatosura dhe atyre të Bashkisë mundësoi lokalizimin dhe shpëtimin e një bariu dhe bagëtive që u rrezikuan nga përhapja e zjarrit në Gurë-Lurë.

Një falenderim i posaçëm për shërbimet Zjarrfikëse, trupën e emergjencave civile  dhe Forcat e Armatosura që mbeten në front të parë.

Rritja e temperaturave, kërkon monitorim të shtuar dhe alertim të menjëhershëm, veçanërisht në zonat malore dhe pyjore të ekspozuara”, tha ministri.

/rtsh.al/