Mbahet këtë të mërkurë (22 tetor) në Londër Samiti i Procesit të Berlinit me fokus kryesor bashkëpunimin rajonal, rritjen ekonomike dhe migrimin. Pjesë e punimeve të samitit do të jetë Kryeministri Edi Rama, si dhe liderët e pesë vendeve të tjera të rajonit.

Kreu i qeverisë shqiptare do të mbajë fjalën e tij në dy panele të këtij samiti, atë mbi “Ambicien dhe vizionin strategjik” dhe “Rritjen, migracionin dhe sigurinë”.

Në punimet e samitit do të marrin pjesë liderë nga gjashtë vendet e Ballkanit Perëndimor, sikurse; Shqipëria, Bosnja dhe Hercegovina, Kosova, Mali i Zi, Maqedonia e Veriut, Serbia; qeveritë partnere të Procesit të Berlinit – Austria, Bullgaria, Kroacia, Franca, Gjermania, Greqia, Italia, Polonia, Sllovenia dhe Mbretëria e Bashkuar; përfaqësues të Shoqërisë Civile, të Rinisë dhe Biznesit nga Ballkani Perëndimor; Institucionet e BE-së – Komisioni Evropian (KE), Shërbimi Evropian i Veprimit të Jashtëm (EEAS) dhe Presidenca e Këshillit; institucionet financiare ndërkombëtare; si dhe Organizatat rajonale.

Agjenda

14:20: Mbërritja e delegacionit shqiptar dhe pritja nga Kryeministri i Mbretërisë së Bashkuar.

14:30: Pritje nga Sekretari i Jashtëm i Mbretërisë së Bashkuar.

14:45: Foto familjare.

15:00: Fillon seanca plenare.

15:10: Paneli i Liderëve të Ballkanit Perëndimor mbi “Ambicia dhe Vizioni Strategjik”.

Kryeministri Edi Rama është planifikuar të mbajë një fjalim.

15:40: Paneli i Liderëve të Ballkanit Perëndimor mbi “Rritjen, Migracionin dhe Sigurinë”.

Kryeministri Edi Rama do të mbajë gjithashtu një fjalim.

16:00: Mbyllja e Seancës Plenare.

Një ditë më parë, kryeministri Rama ishte i pranishëm në Forumin për Sigurinë dhe Politikat Globale në Londër, ku ngriti shqetësimin për mënyrën se si po trajtohet emigracioni në debatin publik në Mbretërinë e Bashkuar, duke e cilësuar këtë qasje si një “lojë e rrezikshme”.

/rtsh.al/