Spitali Rajonal i Shkodrës ka ndërmarrë një plan të posaçëm masash për të përballuar fluksin e shtuar të pacientëve gjatë festave të fundvitit.

Drejtori i spitalit, Senad Halluni, në një deklaratë për mediat bëri të ditur se janë marrë masa organizative dhe strukturore për të përballuar situatën.

Drejtori Halluni u shpreh: “Janë marrë të gjitha masat në hartimin e grafiqeve me strukturat mjekësore, stafin infermieror, strukturat mbështetëse, strukturat e sanitarëve, strukturat e hotelerisë, etj. Pra, i gjithë stafi është në gatishmëri maksimale për të garantuar shërbimin e sigurt dhe cilësor.”

Ai theksoi se fluksi më i lartë i pacientëve pritet të jetë në shërbimin e Urgjencës, i cili do të funksionojë 24 orë në 24, me kapacitete të plota për të përballuar çdo rast që paraqitet. “Duke pasur parasysh që fluksi më i madh është tek shërbimi i Urgjencës, ne kemi shtuar numrin e mjekëve të urgjencës dhe stafin për të pritur qytetarët që mund të kenë nevojë,” shtoi Halluni.

Ky plan synon garantimin e shërbimit shëndetësor pa ndërprerje dhe me cilësi për të gjithë qytetarët që do t’i drejtohen këtij institucioni gjatë këtyre ditëve.

Drejtuesit e spitalit u bëjnë thirrje qytetarëve që, në rastet urgjente, t’i drejtohen menjëherë Urgjencës, ndërsa për problematika më të lehta shëndetësore të ndjekin këshillat e mjekëve të familjes, për të shmangur mbingarkesën e panevojshme të shërbimeve.

Gazetar: Mirsad Rakaj