Në galerinë “ODA” të Shkodrës u hap ekspozita me piktura dhe instalacione, “Struktura të Papajtueshme”, e artistes Majlinda Kelmendi.

Projekti krijon një qasje të veçantë, duke vënë në qendër përplasjen e formave dhe materialeve, si një mënyrë për të treguar se bukuria gjendet edhe te mospërshtatja.

“Unë nuk kam dashur të shkoj tek e bukura, tek e përkryera, por nëpërmjet veprave të mia të shpreh pikërisht që gjithmonë harmonia është ajo çka është më e mirë gjatë jetës. Unë nuk kam qejf ta imponoj publikun. Unë kam dëshirë që publiku të marrë një suport si e mendon, si e përjeton artin tim,” tha piktorja.

Si një pedagoge në Fakultetin e Arteve të Universitetit të Prishtinës, znj. Kelmendi shpreh vlerësimin për zhvillimin bashkëkohor që ka marrë piktura shqiptare.

“Ajo çka për një brez tjetër mezi përpihet, për brezin e ri kapet shpejt. Lëvizjet e lira nëpër botë, nëpër Evropë e deri në Amerikë të të rinjve tanë, por edhe tonat… i përthithin në mënyrë të natyrshme konceptet e reja, kështu që të dyja bashkë sjellin këtë produkt, këtë art që sot po krijohet në Shqipëri dhe Kosovë,” u shpreh znj. Kelmendi.

Prej vitesh Majlinda Kelmendi ka ekspozuar në galeri e muze brenda dhe jashtë vendit punimet e saj, duke fituar disa çmime ndërkombëtare. Çelja e ekspozitës u shoqërua me praninë e një publiku të gjerë, mes tyre personalitete të artit, kulturës dhe botës akademike.

Gazetar: Marjo Gjini

/rtsh.al/